الاثنين، 28 ديسمبر 2009

ما أمرضك !!!


أنا السائر فوق صراط الهوى

و فوق كواهلى أحمل أرتال أوزارى !

أنهكتنى لعبة التوازن

حد الانهيارِ

وتمكنت الأحزان من تكبيل عزمى !

هل تظنين أنى مازلت فارس الأمس العنيد!

اعتزلت الوغى ...

و جلست فى جوف نفسي .. أنزوى فى هزائمى التى تجرعتها

من كف عشقك السودوى !

هذا الجحيم مغلق الأبواب دونى ...

و النعيم لم يأمروه باقتنائي !

و الأعراف مزدحمة بأهل الكشف ..

و أنا لم يكشف لى إلا جمال عينيك المقصلة ...

ضائع فى دنيا من أمل ٍ..

و تائه فى خارج الأكوان!

هل يصدق الحكماء فى قولهم ..

ان الشفاء قبلة من شفاه صادقة!

و الارتواء لا يكون إلا من حنان أنثى ماؤه عسل قراح!


********

ما بتُصدقيش فى الكلام ...

ما بتتعبيش م السفر ...

و جوه صدرك

قلب منحوت من حجر ...

و انا ذنبى ايه .. إنك قمر !

و المولى اعطانى عيون !


*************

حيرتى التى ادمنتها

فهم طلاسم بهجتك ...!

كل يوم أمنى النفس أنه العيد ...

الذى وعدت به من تلميح أهدابك قديما!

فأزين البيت و أنثر العطر المعتق

فلا أحل اللغز

و لا العيد مر من هنا..

و لا أشارك أبدا فى إشراق بهجتك

وفى آخر الليل ألف بالكفن !


*****

ما تصورتش ا

انى ألاقى لحبك مطرح ...

ما توقعتش

ان الشتا يحضنى و افرح !

أصلى عدو الزيف

و ابن الصيف ...

و الاحلام الى شايلها فى دمى ..

ما فيهاش كوابيس

تشبهلك


*******

حين أتيت تعلنين حبك بلا تردد أو حياء ...

قلت ربما هي !

خلاصة خلاصة الأحياء ...

و ملخص سيرة النساء

وقعت صك العشق بعد أن أمليت شرطى ...

سيدوم حبك

يقتات على خبز ى و مائى

.. مادمتى تراعين عصفور حريتى

وتوقرين أبطال قصتى ...

و تندمجين فى أفلام أساطيري التى أصنعها فى المساء

و غفوت على سرير الحلم وأفقت و القيد يدمى معصمى ...

يا أبله النساء !

ان استطاع جيش أمريكا أن يقيد الحلم المجسد

تستطيعين حينها حبس الهواء!


*****

عارفه ..

أنا مت في عمري اكتر من ميت مره ..!

لحظة موتى صحيح قاسية

و جبارة و مره

بس اتعودت خلاص !

وباعود !

موعود

بالتيه فى قصور التيه !

ولا اخاف ...من فشلى و حكمه ..

واستنى الموت

احيانا مستسلم

بس بمثل ثوره!


**********

ما أمرضك

أنا لست بيمارستان الهوى ..

و لا مشفى القلوب

أو خان قاه المجانين

ما أرهفك ..

حين يكون تياري يدفع مركب الغرام لمرفئك

و ما أقساك ..

حين أرفض ترتيل اسمك فى أيام تعبي

استيقظى

ما كنت يوما مملوكا لسيد غير ربى

استيقظي








الاثنين، 14 ديسمبر 2009

فزورة ....!

العروبة ! العروبة؟هى حاجه بتتشرب؟
و لا اسم لجنس بايد أفتكــِر إنه العرب ؟
و لا غنــــوة لحلم ضـــايع فى الشتات ؟
ضيعه شيخ القبيله لما طاح بيه الطرب!

الأحد، 5 يوليو 2009

زي ما حبيتك



وحكيتك ...

زي ما حبيتك

عرفتك للشمس وبكره

يا حبيبه

... إمتى هاتحكينى

***************

تغريبتى ... علشانك إنتى ...

و رجوعى ...من رحلة حيرتى ...

متجرح بمخالب شوقى

ولقيتك ...نفسي تلاقينى !


عنوانك

مكتوب على صدرى ...

ومكانك تحويطة سرى ...

دا نصيبى

وانا مالك صبرى ..

واليأس عمره ما يغرينى ...

ي
تسرسب

عمرى و أحوطه ....

بغنايا

وبحارب صمته ...

واتحايل على يومه وساعته

يتجمد .... لميعاد لقيانا

لحظتها وقتى ها يجينى ...

يدينى ...

من خِزنُه سنينى ... ...

انا بانحت تماثيل الآتى ...


وبالون بالحلم حياتى ...

مستنى لمسه اهدابك ...

تحييها ...تتحرك ذاتى ...

وتهد بخطوة رجليها ...

أسوار القهر .. بتشقينى ...

يا مدينة أيامى الجايه

يا أميرة أيامى الماضيه ...

ياسلاح الحريه الماَضيه ...

دنيايا من غيرك فاضيه ...

وعطشانه

إمتى هاتسقينى ؟

لو كنتى ف مره وجدانى ...

يتحرك قلبى بوجدانى ...

لو جيتى و بقيتى الجانى ...

هيخضر بالخير بستانى ...

رمانه من طرح حنينى .....

الشارع طافح زنازينه ...

جدرانها

الناس و الزحمه ...

سجانها و لا يعرف رحمه ...

و لا يفهم المى و أنينى ...

دخان الشارع و ترابه ...

بيطارد حلمى بعذابه

و بيغرس فى رقابه نيابه ...

يتعور حلمى ويدمينى

*************


الشارع متغندر قاسي

فى الضلمه ...

و ف عز الضهر ...

من أول وللآخر الشهر

بيقدم فى عروض العهر ...

يستعرض عوراته القهر ...

و يلم النقطة ...

على دينى ...


واتحمل لزمان لقيانا ...

الطهر هايرجع ويانا ....

والشارع هايفض رزايله ...

ويردد بالصدق غنانا ...

مش ميت ...

انا عامل ميت...

مستنى رجوعك يحيينى




الأربعاء، 24 يونيو 2009

مقاطع من اغانى عاشق (قالوا عليه عبيط!)



مقاطع من اغانى عاشق

(قالوا عليه عبيط!)

مخطوف مرهون

كده من بدرى ...

ما تقولش ازاى ....

الحامي حرامى

وكان ندرى ...

العمر الجاى ...

سلبوه خطفوه

من فوق صدرى ...

الناس الهاي ...!

********

يا عيال بتحب

و ما تنزش

رفض الظالمين

الدنيا تقوم

ولا بنفزش ...

زى التانيين ...

والفار واقف

ما بيتهزش

عامل تنين

بيصب كساته

من دمى

ماتقولش دا شاى!

*******

مقطوفه حبيبتى أحلامك

شحن و تصدير

مربوطه خطاوى أيامك

و العقده حرير

كان أملى اكون انا قدامك

صعبه المشاوير

اليأس خلاص بقى لجَّامِك

محتاج تفسير

مش عارف ليه غاويه غيامك؟

بَيعَانى ازاى ؟

********

أهرام الجيزة يا عزيزه

عارضينها إيجار ...

ما كبير الحارة المتنشي

عامل سمسار

و الحكمة السايدة فى بلدنا

بيصيغها حمار ...

مزنوق فى حجارة اجدادنا

علشان اسوار

راح تعلى و تعلى ما نهربشى

الخارج نار ...

ما تشدى الحيل بقى يا عزيزه

وتشيلى معاى !

******

حبيت الكلمه و منطقها

حبيت الصوت

وكان ظنى لما انطقها

هايسبها تفوت

لا اتحمل صوتى ولا طاقها

ورفع النبوت

وصدر فرمان يقفل طاقها

و حارسها الموت

ماسكتش لحظه يا ( حريه )

غنيت ع الناى !

******

القافلة :

هجرانى و انا اخلص عاشق

انفع موال

وفى قلبى سهمك كده راشق

رغم الاحوال

انا سيف بتار ايوه و ماشق

ضد الاندال

لمشاعر الحب انا الناشئ

عبر الاجيال

و تروحى لامير المنصر !

قلبك نساى !

محمد عثمان جبريل

الخميس، 18 يونيو 2009

و با كتب لك



و بكتب لك ...

وانا عارف كلامي طلاسم الأحوال ...

و باكتبلك وانا جوال ..

بلا عنوان فاهتجيلى ...

ولا فرصه فاهتردى ...

و متعايش مع الأحزان و متصالح مع بردى ....

وحلمى فى آخر الرحلة يقول الناس دا كان قوال ....

لكن يا خيبة الكلمة إذا بيكونوا سامعينها يدوب جهال ...

وباكتبلك ... و مش عارف هاتقرى ازاى ...

ما أعمارنا سحابة صيف و بتعدي ...

لا انا مالك كده أمرى .. ولا بيدى

دا كان بعدى ...

كأنى قفله للموال ....

مجرد آه ... وتنيده ...

ويا خيبة .. على اللى عاش يقول للناس ما تتخلوش عن الكلمة ...

أساس العيشه حريه ...

وهو يموت بلا ديه ...

فقير ما حملش يوم كفه حفان أموال ...

وكل بُناه

دا قصر حياه

و جدرانه رمال ف رمال ...

و مش عارف دا يأس نهاية الرحلة ...

دى و لا بصيره جتله فى وقت...

مالوش لازمه ...

و روحى كات زمان حازمه ...

بقت مهزومه مكسوره ...

ومضروبه متين جزمه ....

وشمس عزيمتى رحلتها بقت فى زوال ....

و باكتب لك ومش شايف ولا عارفنى باكتب ليه؟

فقال عقلى حلاوة روح ....

ضحكت وقلت ومن إمتى وانا عايش ؟

انا الراسي فى وقت الخوف ...

ولما الشوف بيـتحرم أكون طايش

واقول بعلو صوت الحق هو الأصل ...

و الظلم فى حياة الأرض أصله طفيل.....

( والظالم يا دوب رايش )

ولا حدش سمع صوتى ...

و لا حدش يشوف موتى ...

ما نا لا هابقى لا أنفلونزا .. ولا زلزال !

و على يأسي أنا بحتال ...

و باكتب لك

الأحد، 24 مايو 2009

خواطر شتوية / 1 ــ نسخه من كل الناس ...


كان عندي قطه .. و كلب و عصفورتين ...
كنت
بكل جراءه .. اقدر ابقى سعيد ..
و اقبل ابقى حزين
حر فى لمة أصحابى ..
حر اخلينى وحيد
و اقدر اقول لأخويا لو راضى عن كونه أخويا ..
( انت أخويا )
و لو مش راضى اعمل نفسي ما اشفتوش
و عمرى ما عرفت الكدب ..
و لا عمرى كنت بحب
غير حب بجد ...
يعنى عشقى بيخطي الحد ..
و أدوب .. و اتوجع م الشوق ...
وشعارى ...
( السمع ما يساوى الدوق )
و لما يروح الحب
افوق
واقول من غير تزويق
ما بقيتش بحب
و لا ارضى اكون قاهر ..
و لا ارضى اكون مقهور
كنت باصلى بقلب طهور ...
كنت بشوف
و عيونى شاربه النور ...

و لما حبيت ...
اعمل بيت
قالوا
خليك زي الناس ...
و بقيت زي الناس ...
نسخه من كل الناس ...
و الناس نسخه من كل الناس ...
مجرد صوره بعنين
مبقاش عندي قطه و لا كلب
ولا عصفورتين

الأربعاء، 11 مارس 2009

منمات احلم و الوجود 2


أبسط كفى ...
أتضرع أن ترجع بي الأيام
أستقبلك بغير كلام عيون الناس
أنزع عن نفسي شيبا وعذابا وجراح
أرتد صبيا
لا يخشى موتا ...
لا تستعبده حياه
لا يخشىأحدا...
لا يرجو إلاه ...

السبت، 21 فبراير 2009

منمنمات الحلم و الوجود ( १ )



صخب وضجيج وزحام

أحلامٌ

أحلامٌ

أحلامْ

في خضم الأيام الأيتام

المحمولة فوق براق

رحلته أطول من أى كلام !

وجهته لا يعلمها إلا الله

( إن واتتك كل شجاعة أهل الأرض ...

و تلفظت بأى سؤال

فجواب المجهول المسئول

لا يتخطى حرف اللا ....)

الأربعاء، 21 يناير 2009


مد الأيادي و مد
بكره الأمانى ترد
و تغنى ويانا
مشوار ورا مشوار
آخر الضلام دا نهار
و الحزن ينسانا

مد الأيادي و مد
بكره الأمانى ترد
و تغنى ويانا
الدرب ليله عسير
لكن بنزرع خير
و اللمه سقيانا

مد الأيادي و مد
بكره الأمانى ترد
و تغنى ويانا
بكره هاتطلع شمس
تهرب غيوم الأمس
و الحلم يلقانا

مد الأيادي و مد
بكره الأمانى ترد
و تغنى ويانا
الصدق مالى العين
جوه القلوب بساتين
بالحب مليانه

مد الأيادي و مد
بكره الأمانى ترد
و تغنى ويانا
مهما مشيت سواح
بكره بلاد أفراح
نهواها تهوانا
مد الأيادي و شيل
الصعب بكره قليل
والمولى يرعانا