عشق النور

وعشقتك عشق النور ...
لصباح مستنى النور ....
و لقيتنى وانا المكسور
مشبوك بخيوط الوهم ...
مطلوق بالقوس و السهم ......
يبعدنى هواك واقرب ...
اعطش من بحرك أشرب ...
أشرب أعطش ...
أشرب
أعطش أشرب من تانى ...
وانا وعدي لسه ما جانى
مقتول و زمانى الجانى ...
مزروع و هواك الجانى ...
و مواسمى تعدي بلاش ...
قالى شيخى ما تهواش ...
وانا قلبى السكر باش ...
واتبخر ولا يدراش ...
شيخى انى ما باخترش ...
ولا بملك سقف وفرش...
حسبى الى استوى عا العرش
وانا ذنبى عشق جمالك ....
قلبى سهانى و جالك ....
يتأمل نَضرة حالك ....
نورى فى الليل الحالك
وندور على أشعار
تقدر توصف أقدار ..
بس الى إتملى حلالك...
يا حبيبه ولا نلقاش ...
صوتى فى بوحك متحاش
لو اصبر او ما صبرش
خايب مهما أدُور
وكلام الناس بيخاف ...
و بيعجز عا الأوصاف ...
و أحاول و لا أقدرش
و السعى يضيع ببلاش
مين بقدر يوصف حور
وعشقتك عشق النور ...
لصباح مستنى النور ....
ومسلم و لا ها أكابرش
حسبى الى استوى عا العرش

اركبى شمس الصباح

هو أيه الى ماسك فى  رقابيكي

 و منعك تصرخى ..

أصرخى ...

هو أيه يسوى الألم

 من غير حصاد؟

أصرخى ....

ما فاضلش فى الصفه خبيز ...

و لا فى الفرن ريحه للبرام ...

خدوه حرام ....

 ( يا عزيز يا عزيز

 كبه تاخد الانجليز )

و انت واقفه تشّربى

 فرد الحمام ....

ولسه فى جوفك عطش

 نشف شفايف الكلام

صبرك مفارخ للمذله

قولى يالله ...

فارق الدار الحزين ...

وارمي خلفه ألف قله ....

هى عله...

و لاحكمه ...

 فى زمان مجنون يا يامه

صلى عند مولانا الإمام

و اكشفى راسك

اكنسي فرش المقام ...

واركبى شمس الصباح ...

وامسكي يا امه الزمام ....

التاريخ غير ملامحه

فرسه إتجنن و زام ...

العبيد صبحوا مقادم ...

الحرام أصبح حلال

و الحلال هو الحرام ...

وانت قاعده على الطريق ...

تحلمي بالحر راجع ...

الجدع فى الغربة ضايع

بيشرب النفط فى كاسات

يمز بكل ألوان الآلام

الجدع فى الزحمه راضع

خوف و حزن و بهدله

يا امه يا عاشقه المواجع ...

ألف عام ...

ما فاضلش فى الصفه خبيز ...

ولا فى الفرن ريحه للبرام ...

 

 

 

 

 

 

 

 

 

 

 

 

 

 

أنا الشعر ..... أنا

الحروف هى القصيدة

 و القصيده مبعتره

لو فضلت فى السكوت

 يبقى هاتشدك ورا

لو قدرت تغنى نفسك

 يطلعك حرفك لفوق

تلقى روحك بالمعانى

 مدينه عامره منوره

و الحروف هى القصيدة

و السكوت يعنى الفنا ..

لو ماكانش لى إسم ..

كنت إزاى أكون أنا

والملامح تبقى توهه

لو ما تترجمش صوت

جمله حايره عا البيبان  ...

نفسها تبقى غنا ...

و الحروف هى القصيده

بس من غير المشاعر ...

تبقى فوضى فى النفوس

لحد ما يعشقها شاعر

كل حرف يبقاله لون

كل لون بيضوى نجم

كل يوم يبقاله طعم

عمره ما يكرر مناظر

و الحروف هى القصيدة ....

 

 

البهلوان

البهلوان

زمانك زمان

 وقلبك جبان

وأجدع مخادع يا بهلوان

عيونك بتكدب

إيدك بتضرب

وعامل كأنك أصل الحنان

قلبك مكاره

للكل كاره

وأوجاع حياتنا عاملها لبان

تصبغ  تلون

لبسك يجنن

وتحت الهدوم مخبى شيطان

وعودك مكايد

للحلم صايد

وانت بخساسة يا دوب  ألعبان

براءة  عيونك

دايما تخونك

وخسة ظنونك لينا تبان

بإيدنا يا خايب

هاتلقى المصايب

تعمل جنابك ركوبه وحصان

 

 

 

 

فى النشوة و مش قلقان ...

حواديت الليل المرعب

كلها عفاريت و غيلان

و الصوت الحاكى الواهن

فى النشوة و مش قلقان ...

وكلامه بيبنى فى خوفى

أبراج سوده و حيطان ...

أنا الطفل الليل الخالد

محبوس و بقالى زمان

*****

وانا كل ما اقول التوبه

أقدارى تقولى بلاش

متغيب ليه فى الغيبه؟

وغنايا ليه متحاش ؟

واحلامي ليكوا غريبه

أنا وقتى لسه مجاش؟

العمر اتجرف طيبه

و الحب اتباع ببلاش

*******

مريم هزت نخلتها

و انا نخلى مش طراح

و الجزء دا من حكايتها

أتراح بتجيب أفراح

وبرغم انى الى حكيتها

سِفرى بقى اسمه جراح

متحرم حتى فى وطنى

وفى وطنى وطنى مباح!

******

بحبها و الله يعلم وبيه كافى

لما يطول الشوق

بروحلها حافى

ولما يجي البرد

باشاركها فى لحافى ...

وف وقت زحف العطش

انا نهرها الوافى

هو نصيبى كده ...

حماله يا كتافى !

*****

لميت الباقى ف عمرى

وسجدت على الاعتاب ...

الوقت خلاص من بدرى

ما يكفى أى عتاب ...

وكلامي فاضح سرى

لا مجامل و لا كداب ...

السعى فى وقت الضلمه ...

دا مجرد محض سراب

قتلونى فقتلوا الصوره

دفنونى بشرع غراب

وصحيت والروح منصوره ...

وشربت من الأحباب ...

وحبيبى قرب منى

وفتح للنور الباب ....

بصيت فى مراية روحي ...

لقيت مكتوب فى سفوحي

اليوم ما فيهوش أسباب

ونسيت أسمي وملامحي

ما انا قمحى وفا وطاب

و اليل غير حواديته

ولاقيته

بيحرر قلبى فتخرج

عصافير النور أسراب

رجع القمر...؟

رجع القمر ...؟

و لا ضلله الطريق ؟

حسيت بضيق ...

لما بصرى انجلى ...

شفت الضلام حق وحقيق

زاد الوله ....

و الشوق حريق ....

يا صحبة الأيام أفتونى فى الهوى

و اوصوفوا للجى إزاى القلب ضل و القمر عمره ما طل على ليالى غربتى ...

قولوا لإبنى ان ما لحقتش أعلمه

العدل هو المسأله ...

مش الطلوع ...

و الحِب ما بيعرفش جوع ...

و السعادة و الدموع ...

تعنى الحياة ...

و الموت عمره ما كان المعضله ....

يا صحبة الأيام

لا تنسوا سحنتى ...

و لا تنسوا لمسة حنانى على الكتاف ...

قولوا للجاهل خطوتى  ...: " كان ضعيف .. لكنه أبدا و لا ليلة  خاف ..."

ورددوا فى قبضة السكتة القويه غنوتى ....

قولوا كان يعرف يقول حرفين لطاف ...

لكنهم عارفين يشاروا على النمرده

بلا تردد أو ارتجاف ...

افشوا سرى .. قولوا كان بينسج الأحلام بشر ...

بلا طلاسم أو جلا ...

******

من صغر سنى ...

 وانا بحلم بالسما ونجومها

 يبقوا لينا  صحاب ...

و القمر فى حلمى عمره  ما خانا

 و لا مره غاب ...

من صغر سنى و انا قلبى زي كتاب ...

مفتوح لكل من يريد ...

وكلامه توت

كل المواسم موسمه .. يانع و طاب

و حنانى بيت مالوهش باب ...

وكبرت ملامحي بقيت شباب ...

وعشقت ميه من الحسان ...

وعرفت يعنى إيه طعم  الجنان ...

و صاحبت الحرامى و الشريف ....

و قابلت ليل شكله مخيف ...

و قابلت فجر من  الأمان ...

كاشفت ناسك ألعبان ...

و عرفت مجرم بس دايب فى الإيمان ...

و العمر جرح ... اليوم  نزيف ....

الشعر شاب ....

لكن يا صحبة الطريق ....

رغم المشاوير العصيبه

فى بحار الدنيا و فى صحارى العمر الطويل

روحى ما طلعتش من بيضة الطفوله ....!

******

يا صحبة الطريق ....

عارفنى ؟

عارفين إسمى ؟

رسمى ... نبرتى ؟

مش عارف ليه ... عيونكم ما بتعكسش صورتى ؟

ولسانكم ما بيردش سلامي ...

هو انا طيف ولا انتم مجرد خدعه من خيال ؟

يعنى ضيعت دموعى على حزنكم هدر ...

و فرحتى لبسمة الرضا على شفايف حلمكم .. كانت سراب ؟

و لا انا الى مش موجود ....؟

ها...

موجود؟

 

 

 

اعترافات عاشق

أذبت فى كوب الهوى أحلامى ...
و أهرقتها يد الزمان
على أرض المنايا بنيت بيتى ....
وظننتها وطن الأمانِ
فما انا غير خيال للآمال...
و ما أنت غير أوهام الحنانِ
الحب يا صغيرتى لا يعنى عشقا ...
و العشق مقصلة الأمانى

 

 

*********

ونفضت عن راسي الغبار ....
وقعدت أنسج فى النهار ...
وقفلت بابى على البراءة ...
حافظت على باقى إنبهار ...
ما فاضلش فى الزحمه اندهاش ...
ما فاضلش غير الانكسار ...
ما يخمكيش فردت قلوعى ...
ما تعجبيش بالكلام ...
دي يا حبيبه لو عرفتى ...
هى صحوة الاحتضار ...
علشان كده من غير رتوش ...
انا ما بملكش القرار ...

 

 

********

يا لائمى فى العشق مهلا...
شيبنى الهوى
وما ارتويت
وقاتلى لحظ الغوانى
مت كثيرا
و ما اكتفيت
وأنهيت الحياة فى لج عشق
لكنى أبدا ما انتهيت
كلما قلت كفانى
كأنى قلت انا ابتديت

 

 

********

ملعونة عيونى بلعنة شوف
والقلب المنهوك ملهوف ...
لمكان حاضن أحضانا ...
من غير ليه...
من غير خوف ...
من غير خوف
من غير خوف...
ممكن ؟
ولا ها تقولى ظروف؟

 

 

**********

يا خالقى الوجد سجنى ..
و السجن عمر لا يعود
فما بال الأيام تجرى
لا تحققنى أبدا وعود
أجود بالحب
و قلبى ...
و الحياة بالحقيقة لا تجود
مفعم بحب ما خلقت ...
فلما يقيد أيامى الجمود

 

*********

 

فكرنى الصوت .. إنى ليا لسان ...

و الألم المكبوت إنى آه إنسان ....
ما يهمش شكل عيونى ...
ولا لونى ...
ولا حتى الوقت الأفضل لجنونى ...
كل اللى يهم أنى ما زلت بافرق بين الشر و بين الخير
و انى لما يملكنى شيطانى...
بافوق و ابكي و أعانى ...
إنسان ...!

 

محمد عثمان جبريل
16/7/2008

المنتصر/ المهزوم

لست نثار الكلام ولن أكون...
أنا التحدي حين يوصف بالجنون
أقسمت أن أحفظ لساني فلن أخون
ماذا تبقى من حروفي
غير حرف شائخ
وبقايا من كاف و نون
كلت رياح البحر عن لطم الشواطئ
و الجفون ..!
فافتحي عينيك
يا بحرية المآقي
حين تضحك السماء
أو حين تقبل السنون
ــ ها أنا قادم بعروس البحر
مذهبة الأظافر !
و بالخير الوفير ... .. في المواخر
و بالمهر العسير
أسنان غولة المصير
و الشجون .....!
هل تقبلي
فارس الأشعار يا فتاتي الساذجة؟
اقبلي أو لا تقبلي ...
كلا يهون !!!
كهل المخاطر ما عاد يطربه الهوى
فضمي أطماع العذارى في الفراش
أو ضمي وهم أحلام الشراهة و المجون
فأنا أنهيت الحقيقة ..
و الظنون !
و أعلنت بمحض إرادتي
ــ رغم انتصاري ــ
انى وحدي المنهزم
و تغرغرت بماء التخاذل و الألم
و ها أنا أبصق هذا المزيج الحامض
في وجه الأميره
يا أثيره !
ــ أ تسمعين سب السكون ــ
أنا لست نثار الكلام ولن أكون
أنا التحدي حين يوصف بالجنون!

من أنتِ؟؟

حبي لك نزوهُ؟؟

من أنتِ؟

من كنتِ؟

من قبل أن أهوى؟

لا شئ يذكرك

لا شئ يا حلوه!ا

لآن أصبحتِ

في شعري كالنشوى !

كالعطر .. كالنجوى !

ــ حبي لكِ نزوه!؟ ــ

عودي كما كنتِ

لا شئ يا حلوه

لا شئ يا ..............

من أنتِ؟؟

محمدعثمان جبريل

الوقت مش لينا ...

الوقت مش لينا ...
ما خلاص اهو مشينا ...
خلصنا أحلامنا ...
دابت أمانينا
راحلين هدفنا فراغ
و الوقت عدى وراغ
جسمه مالهوش دماغ
ما فهمشِ أغانينا
والوقت مش لينا ...
وانا وانتِ جملة شعر
و دقيقة تسوى العمر
لكن يا بحر السحر
حلمى ما لوش مينا
الوقت مش لينا ...
كان نفسي أطول شطك
و اقطع بقى صمتك
و الملم خرز فرطك
عاجزه قوى إيدينا
الوقت مش لينا ...
شيبنى طيف الحب
و البحث ليه عن درب
لو الوطن ليه قلب
ما كنش باع فينا
و الوقت مش لينا
الوقت ملك الخوف
دى حقيقة ملو الشوف
لو تقدرى عا الزيف!
يا حبيبتى عدينا
و الوقت مش لينا

أنا....! يمكن؟

(....) أنا يمكن أكون.!
أو يمكن ..
مش موجود!!
أنا بيني و بينك مشاوير
وطريق مش عارف أخره
وزمان لساه ممدود
و لكني
يا أميرة حلمي
قارب بشراع مفرود
بيخطي في الموج العاتي
بيعافر
في محيط مجهول
بيصارع ...و لابد
يعود
بيدوُّر
علي شطك لكن
مرساه دايما مرصود
يا حبيبه ..
ضيعنى زماني
يا حبيبه ...
وعد وموعود
الشيب ما ظهرش في روحي
انا لسه في عينك مولود
انا يمكن أكون جواك
أو يمكن ....
أنا ...!!!
مش موجود!؟