أنا....! يمكن؟

(....) أنا يمكن أكون.!
أو يمكن ..
مش موجود!!
أنا بيني و بينك مشاوير
وطريق مش عارف أخره
وزمان لساه ممدود
و لكني
يا أميرة حلمي
قارب بشراع مفرود
بيخطي في الموج العاتي
بيعافر
في محيط مجهول
بيصارع ...و لابد
يعود
بيدوُّر
علي شطك لكن
مرساه دايما مرصود
يا حبيبه ..
ضيعنى زماني
يا حبيبه ...
وعد وموعود
الشيب ما ظهرش في روحي
انا لسه في عينك مولود
انا يمكن أكون جواك
أو يمكن ....
أنا ...!!!
مش موجود!؟

هل تحبين الليلة أن أطارحك الغرام..؟

ماذا نرجو من ربيع

لم ير شمسا ولم يذق ماءً؟

و لا يعرف عنوان الحقول

أى وهم ننتظر؟

الموت قادم
..
العلوج الأمريكان فوق صدرك استوطنوا ..

أتحبين الليلة أن أطارحك الغرام .. ؟

ألن تخجلى ؟

أليس الحب من أسرارنا الكبرى ؟

.. انهم يتفرجون ..

يشهدون عريك...

حتى وانت فى الخلاء!...

فى الماضى

كانوا فى الخفاء يتلصصون
..
اليوم ينظرون.... فى العلن!

من تريد الاحتشام ....

فلتبيت الليل واقفة ...!

أنا .. شيء شبيه بإعلان قديم ..

يغرى بسلعة تجاوزها الزمن..

لم تعد فى حوانيت التجارة و الصناعة و الزراعة والبشر !

وانت .. لم تعرفى يوما أن تتلبسى دور عاشقة

أو حتى غانية

لا أمنعك عن خمرة الوهم .. و حشيش الفرح ..!

كل من يسير ..لا يسير ..

كل من يقف ..لا يقف ..

كل من تغنى بالكلام .. صامت ..

و كل من حارب اليأس .. عاجز

الكل واهم ..

إلا أنا ...

لكنني .. بلا يد أبطش بها

و لا قدم ..

تعرف المسير

و لا أرض ..

أحس بقسوة حجارتها ..

و لا حنان ترابها القديم...

و حتى لساني ..

مرهون

فى دكان المرابية العجوز!

لا أمتلك إلا عينا ثاقبة ..

وقلبا مفعما بالحياة...

و ما عداهما رؤى ...

و قبض التوهم

ككل ما أملك

و كل ما تملكين!

يا حبيبتى دا أميرك غول .....!

سمعانى ؟

دا كلامى يعانى

فى معانى

عاجزه عن القول

ونا واقف

فى رحابك ...

بابك

ليه دايما ألقاه مقفول ...؟

و الرابض فوق تلك ...

قالك

بهواكي قلبه مشغول

و ضجيجه

مليان بأغاني

مزحومه

بكدبه المعسول

و إيقاعه

يخدر فى كيانك

و بيجنى وحده المحصول ...!

ونا عاشقك من قبل السد ..

و مشاعرى ...

طب ليه تترد

يا حبيبتى

دا أميرك غول ...

ونا طالع...

من بين حواديتك

و ف يدي سيفى المسحور

سهانى

وخطف أيامي

كان نفسي

أجرى على حصانى

و أسابق زمنى المستور

و أجيبلك

م الجاى ... من بكره

حريه

ف طبقى البنور

ضمينى

إدينى القدره

من غيرك عاجز

عَ الفكره

و الضلمة

محوطانى بسور

لا بيدي ..

أقفز و أعدي

مستنى هايجينى الدور ..

يدبحنى ...؟

تتجدد راسي

يقتلنى ...؟

أنا مش مقتول

و باغنى من قلبى الحكمه :

( مِن يصبر لازم هاينول ...!)

فتافيت العشق و الاحتمال

و لسه

و لسه يا قلبي يتغنى

ولسه

يا عمري مستنى

ولسه

كل ما تعشق ...

يكون عشقك سبب نكسه

و لسه..

الطفل في صدري

بيتحكم

برغم الشيب بيلعب بالهوي ...

و يرجع تاني متألم

ويتمنى يدوب لمسه

ولسه

شيطان الشعر بيحاور

يملي كلام مالوش معنى

ولسه

ما عرفتش......

أصاحب يأس ايامي

و أنسي وش أحلامي

و أرجع راضي بمجرد

سلامة بدني قدامي

و اقول فرصه

و لسه

بدور في ضجيج الكره

عن طفله ..

تقول الحب بالهمسه

و لسه ...

و لسه

و لسه

بس يا قلبي ..

من عمريفاضل لسه؟

* * * * * * * *

القمر يلعب ليلاتى فى التراب

صمتي أنا مش دروشه

وضحكتى مش فرفشه

ودموعي لا تعني إكتئاب

أنا اللى غاب وقت الشروق

واستخبى فى الحشا

الوهم زيي

وانا زيه أنا

زي السراب

أنا اللى نزلت القمر

يلعب ليلاتي فى التراب

و انا اللى غنيت فى السكوت

وانا اللى مديت الخطا

فوق بحر هايج مـ العذاب

و لحقت آخر مشمشه

طارحها يا شجر الشباب

انا اللى فكيت الطلاسم

فى العلن من غير خشا

صمتي أنا مش دروشه

وضحكتى مش فرفشه

ودموعي لا تعني إكتئاب

أنا اللي زينت المآذن بالنجوم

و علقت على صدري الهلال

و انا اللى زارع جوه كفي

جنينه بطرّح حلال

و عملت من ليل المحاق

صبحايه لونه منقرشه

صمتي أنا مش دروشه

وضحكتى مش فرفشه

ودموعي لا تعني إكتئاب

أنا إللى حررت اللسان

و جعلته مدفع بجنحات

وطلقته فى صدر إللى عامل نفسه حي

مع إنه مات

وانا إللى لّمّيت السكات

من سكات

و طرحته برايا الحدود

وانا إللى حاسس بإللى جي

ألف زلزال فى القدر

بس آه..

الوقت فات

وانا وحدي بتركع عشا

صمتي أنا مش دروشه

ولكنه صمت العاشقين

وضحكتي مش فرفشه

لكنه ضحك المشفقين

ودموعي لا تعني إكتئاب

لكنها تعني الصبابه للجمال

آه يا عشقى

آه يا عشقى ...

كل ما قلبى يقرب ...

ليه تغرب ..

لحظة الصدق ف عينيكِ

وف ضياع الخطوة

كل شئ جوايا يهرب ...

من عنيا ..

ألقانى فيكي ...

كفى الطارح توت

وانا جنب الحيط محطوط

مضروب مهرى و مخبوط

بالكف الطارح حنضل

وانا كفى الطارح توت

أياحلمى الاخضر أخطر

أيا حلمى أوعه تموت

يا عروسه حلاوه زواقك

بالدم و باقى حنوط

غنيت الغنوة عشانك

غنيت و الأمر سكوت

يا عروسه حلاوه اتمنى

واهى علقة لابد تفوت

ونا جنب الحيط محطوط

و عيونى فيها دواير

وشموس و قمر بسام

بيقول النكته ينور

و النور فى لسانى كلام

بيدور عا الدور و جوامع

بيطير ما تقولش يمام

أيا طالع المدنه يا شيخنا

إدنلى أدان ما ينام

العالم كله مدروخ

العالم كله نيام

و العقل فى أعلى طواله

بالسلبة التيل مربوط

ونا جنب الحيط محطوط

مستنى يمر الموكب

مستنى يجي السلطان

و البنت الحلوه بتخطر

لابسه لولى و قفطان

ما هى بنته و راكبه هوايا

و هوايا و لا الرهوان

عامنول شفت زهورها

و أمبارح بقت رمان

ف الحلم الأخضر ياني

محطوط و بقالى زمان

انا جنب الحيط محطوط

أيا نجم السعد العالى

أيا مالى ف الفسحه

حواديت نينه

إمتى هتمر قبالى

و الحظ يكون فى إيدينا

أضرب سيف يد الحيط

اشرخ سكه لغناوينا

يعلى و يرفرف صوتى

ما احلاه فى السكته الصوت

...

يــــــــاه

..أنا جنب الحيط محطوط

حكاية ... على قلبى

( الأوله)

يا ألف حكايه

مكتوبه على قلبى

و ألف بدايه مرسومه على دربى

أنا شاعر.....

.باقول الكلمه

واتعذب

ونا صادق

بحرف الدم

مكتوبى

وحرف الحق محبوبى

وحرف الحق

ما يكدب

وانا عطشان

وكيف اشرب

و كل الخلق عطشانه

شواشى النخل فى العالى

و انا شايل

وحزن الخلق أحمالى

و نبت الحب فى قلبى

دا راس مالى

* * *

( التانية)

يا ألف حكايه مكتوبه

على قلبى

دا أنا الإنسان

و ان الباقى

فى درج الصدر نبضات

و انا فى الصمت أصوات

و انا القومه

تدب فى عرق اموات

وانا العاشق

تراب الرجل يا حبى

يا ألف حكاية مكتوبه على قلبى

مدى ايديك فى العتمه

دربى الخالى خداع

وانا اللى ضعت فى الزحمه

و انا اللى تهت فى عينيكى

امام القاضى والتهمه

أحابيكى

يا خضره العين والمهجه

يا حبسه فى صدرك البهجه

أنا الغرقان

فى بحر الشوق وتغريبه

وانا الممسوك فى تهريبه

باهرب ليكى أوراقى

وطلق رصاصه العسكر

عشقى

و نبض أشواقى

****

(فرغت الحدوته)

يا ألف حكايه مكتوبه على قلبى

سؤالى إيه أنا ذنبى؟

يا ألف بداية مرسومه على دربى

جعلت عروقى أوتار

عملت الريشه

من نار

وقعدت أعزف

وتارينى بلا ما ادرى أنا

بنزف

ولم يبقى

جوى عروقى إلا انت

لو تحسى ....!

لو

تحسى و تعرفى

لو

تجسى نبض قلبى

تخرفى

تخلعى توب الخشا

وتلبسى توبى الخفى

لو

لو تحسى و تعرفى

مين خيانته زى ضله

ومين ف عشقك وفى

تضعفى

تحضنى عمرى بجراءه

و بهوايا تكتفى

لو

لو تحسى و تعرفى

انك انت صوره ليا

جوه روحك ترجفى

تتشففى

ترقصى من غير ايقاع

وف حضن صدرى تستخبى

وتختفى

لو

بحبك تكونى

بحبك تكونى

إيمانى و ظنونى

و لحظة جنونى

وحلمى البراح

أهاجر تجينى

ف تشفى حنينى

أسامح سنينى

و أنسي الي راح

يا قصة حياتى

يا ذاتى فى ذاتى

يا عمرى إللي آتى

يا طرح إللى راح

أقرب تقابلى

من قبل قبلى

تدوبى فى قُبلى

و عشقك مباح

يا سكنه فى عيونى

فجسمي و لونى

يا دارى ومعونى

و شمس الصباح

أكونك تكونى

إيمانى و ظنونى

و لحظة جنونى

و حلمي البراح

لملمينى ....بقى

لملمينى

زى ما بتلمى شعرك

بعت عمرى..

وجبت مهرك

بس قهرك

غمى حلمى

خبى صورتى ..

خلف ضهرك

طفى قمرى

جوه سهرك

بس جيتلك

فارس الخلاص و مُهرك !

آه يا عمرى

ــ عمرى هو ..

هو عمرك !

فتحى في عينك

شوفى

وحدى عاشق

وحدى راشق ..

جوه قلبى ....سن سهمك

و قطر دمى

عُقد ليكى

كل حَبه عليها اسمك

لملمينى

زى ما بتلمى شعرك

ارسمينى ف دنيا تانيه

غربها حد عشقى

شرقها ..على شط جسمك

لملمينى

زى ما بتلمى شعرك

بره أسوار المداين

من زمان لسانى واقف

قالوا : يمكن تفتحى

قالوا جايز يومها لمسك

قلت .. عشقى

ويا صبرى ...هما بكره

وهما أمسك ..

افتحى البيبان ومدى للقا ..

قلبك وجسرك

لملمى

لملمينى

زى ما بتلمى شعرك

أرجع و .. أدوب

حزينة .. حزينة

خطاوى الدروب

سجينة الغناوى

فى قلب الغروب

عيونهم سلاسل

لكن بحاول أعافر ..

أسافر ف درب الحياه

يمكنألاقى

فرحى اللى تاه

جوه الدروب

أرجع و .. أدوب

فى ننى المسافة

وأعشق ضياه

أصله دا ساكن

جوه الصدور

ليل البغاه

وجنى الحكاية

بيقعد معايا

وبسهر معاه

ونغزل أيادى

حره و طليقه

و ننسج حياه

فمطرح بيطرح

نور العدالة

أرضه وسماه

ونرسم خيال

المحال البعيد

تعجز ايدينا

تضلم عنينا

و ترجع حزينه

خطاوى الدروب

و..عادت !!

وعادت

بلحن الزمان البعيدْ

وجاءت

لتبنى فوق الأماني

عمرا جديدْا

لقلب شاخ!

كيف أحرك هذا البليدْ؟

ماذا أقول؟

و عمرى كله

ماذا يفيدْ؟

نسيت الكلام

فكيف أغنى

فيك النشيدْ؟

ما يهزنى برودها...!

كل الكلام انتهى ...

مفضلش غير:" رافض"

ما فضلش غير لأَ

حبيبتى من جبنها

مش راضيه نتواعد

حتى السما الزرقه

بنجومها بتباعد

وجدرى القديم

عافر

لسه شديد صامد

لا يهزنى برودها

ما يغير العارض

مالو الصحون رقه

:

ما فضلش غير لأَ

****

كل الكلام انتهي

وعطشان يا حريه

القمح طرحه بشقى

الزرع مش نيه

هاحضن

وحضنى المدي

و افتح بقى عنيا

الذل دا ليكم

و العز.. لاق .. ليا

نشفت بحار الصبر

ما بقتش انا سقا

ما فضلش غير لأَ

***

كل الكلام انتهى

إلا كلام روحي

براقى للمنتهى

بيقرا فى لوحي

وعشقها سرها

وعشقى مفضوحي

لما أكون ساجد

ومسجدى بوحى

ألمى خلاص انمحي

ضَمدلى فى جروحي..

و هاخاف ليه ....؟

حقا ....!

ما فضلش غير لأَ

كل الكلام انتهى ...

حبر القلم باهت ..

و الصفحه من حزنها

اتكرمشت شاخت

وبرغم كل العنا

فى قلبى لسه غنا

طب ليه أعيش ساكت ؟

لازم أقول .... لأَ

ما فضلش غير: لأَ

عيل عنيد فى الهوى...!

لسانى كما آنى

عيل عنيد فى الهوى

وحنانى

بيملانى ..

لما اشوف إنسان بجد

و ألقانى ...

برجع شفيف.....

لحد الهوا

لحد النور اللى انجلى

فدك الجبل

و صحاني

و أعانى

زي المسيح

و أحضن آلامى بالرضا

و استنى لمسه من إيديها

تشفى الجراح

و تتفتق براعم حلمنا

على طير يهاجر م العنا

لأحضانى

فى أرض النهاية والميعاد

و الكل واقف منتظر

قدام حوض سيدنا النبى

و انا مش عانى

لأنى دخلت جنه ربنا

لما خلانى

جوه عنيكى

عيل عنيد فى الهوى

و أبقانى

لسه بقول فى الهوى

لسه بقول فى الهوى

أحلى أغانيا

إتّطَلعوا فى قلبى

ما تلاقو غير هيه

و الحب ياصاحبى

مش بس ملاغيه

هيه كفرد حمام

و أنا قلبى بنيه

وبرجها روحى

وعايشه بصحيح فيا

لسه بقول فى الهوى

وبدادي فى حِبى

هما الى خانواوانا

فى الزحمه إيه ذنبى

هما الى باعوا وانا

شاريها و بغلبى

السعد منحظهم

وانا همها مصاحبى

تلاقينى بالقسوه ..

تلاقيهم بحنيه

هه...!

ولسه

بقول فى الهوى ...

أحلى أغانيا

حوار فى الزمن الضايع

: أنا فاكر ...عشقى و جنونى

رنة ضحكة تليفونى

لما ينادى القلب الملهوف لجناين صوتك

يخدونى

: ـ ونا فاكره .. سواد الننى

و أمانى القلب المتشوق

لنعيم الحضن يسكنى

و يصحى فيا زهور الأنثى

بربيع النشوة

و لقيتك صوره أكلها الماضى

للعاشق صاحب ليلى

لحليم فى الفيلم الخايب

لميت أحلامى

ونا خايفه على عمرى ... ونسيتك

: ـ انا فاكر لون الخجل المتزوق بيه الجفن

و طيور الطهر المفزوعه فى عنيكى

لما قتلنى الوجد

جمعت مشاعرى فى الكف

وحضنت ايديكى

: ـ ونا فاكره رعشة جفنك لما تشوف عصفور مجروح

عجز عيونك عن رغبة قلبى المدبوح

تخبيطك بالايد العرقانه

على بابى المفتوح

و قفلت الباب

ودعيت من قلبى

إن شا الله تروح ونسيتك

: ـ انا فاكر إنى قريت على صفحة عينك

شهادة طهري

و حكم النفى

وبراءه من زمنك

....وفرحت!!

روح بردانه

أنا روح بردانه

عيون مقفوله

ومش شايفه

يمكن بتعافر فى طريقها ...

يمكن خايفه

و الخوف سجان

يأمر بالواجفه

و بالواقفه

ولا تسمع ليه ...

ولا تسأل فيه

و تطير لبراح

أوسع م الكون

صافى وحنون

و الصمت موسيقى مختلفه

تصبح إنشاد ...

يخلص تتعاد...

و الحب ميعاد

و الوقت رماد

و السر بيتلو

فى إسراره

( طه*ما أنزلنا عليك القرآن لتشقى )

كاس الإسعاد

إشرب يا فؤاد

أفراح... أفراح

و العشق مباح

و الروح ترتاح

ف بحور النور و الألفه

من غير الشوف

تبصر و تشوف

تشرب م الإيد المبروكه

أهنأ غَرفه

فتعود للأرض المسكينه

وانا روح دفيانه

عيون مقفوله ... لكن شايفه

فتافيت العشق و الاحتمال

يا حبيبتى لاقينى
نفسي تضمينى
البرد هالكنى
و البعد سابينى

يا حبيبتى مش قادر ..
أزاى أكون طاير
وجناحى ناسينى
وانت السما فيكي
هاجره عناونيى

****************

حطيت الأمس فى جيبى ...
وطلقت لبكره براح
كان أملى أعيش وارتاح
سرقونى فى لحظة وجد
وانا عاشق أصلى بجد
لا لقيت الامس معايا
و لا بكره طلعله صباح
****
قابلته زي ما سيبته
وقابلنى لقانى باشيب
طبطب على كتفى وقالى:
قمحك مش راضي يطـيب
ولا عمرك كنت فى أهلك
و لا عمرك كنت غريب
واقف تايه فى البين
لا بتاخد ولا بتجيب ..
فجأة بدأ الرحلة
يبعد
وانا إيدى تسيب
صرخت بنادي عليه :
يا أملى انا بيك مستنى
يا أملى ليه بتخيب ؟

****************

كل شئ
يمكن هنا
أو مش هنا
يمكن هناك
يمكن فى أبعد ركن فارغ فى السما
يمكن فى زواية فى قلبنا ..
يمكن توهم ...
يمكن سراب ..
يمكن مجرد كلتمين جوه كتاب
يمكن فى قيمة التراب
يمكن يكون أغلى الكنوز
يمكن يجوز
يمكن
انا ..
يمكن عيونها الطيبين
يمكن فى منحور على الطريق
يمكن جنين
يمكن
فى وردة
أو فى شوكها
يمكن عبير
يمكن فى جيفه
لكلب أجرب
يمكن ف نجماية مغرورة الضيا
يمكن سواد بيمص نور لسه وليد
يمكن قدر
يمكن نصيب
يمكن كوميديا
يمكن مآسي لابسه توب من الحداد
يمكن تلاقى نهد بخنجره
يمكن
شباب
يمكن عجوز
يمكن قديم
يمكن جديد
يمكن موسيقى
يمكن ضجيج
يمكن ..
يمكن يجوز
بس الى متأكد منه قوى ...
مش مرهون فى بنك الاحتمال
"نبض قلبى لما شافك"

مساكم فل يا ولادي

مساكم فل يا ولادي
مساكم نور ... بيتسرسب يضئ الروح
أكون بردان
و ألقاكم دفا و حنان
و اكون مدبوح
تحيينى ابتسامة طهر
بتزين خدودكو الورد
و أخد و رد ...
(بابا جه)

مساكم عمر..
يتجدد فى أحضانكم ...
مساكم خير وغفران من خطايا ..
بتملانى بعيد عنكم
مساكم صباح القلب و أفراحه ...
وراحتى لما ترتاحوا
مساكم ضحكة بتنور و تعمل بيت ...
حيطانه من حنان روحي
وروحت وجيت ...
معلق صورة لوشوشكم على قلبى ...
مساكم حلمى يتحقق تشبوا حتى لو سنتى
نفوس شايله كتاب سيرتى ...
مساء الفل يا مريم
يا روح مامتى
مساء الفل يا ماجد
يا صوره حلوه لرجولتى
مساء الفل
ياعلوه ...
يا لحن حياه فى غنويتى
مساء الفل
يا فاطمه ...
يا زهرة حب فى جنينتى
مساكم فل يا ولادي
مساكم حب

صاحب الطريقه

أنا صاحب الطريقه
ومصاحب الطريق
و بانشد للحقيقة
و للعدل و البرئ
سبحتى الدقيقه
كهرمانها عتيق
و محرابى حنانى
و خلوتى الصديق
ما نا صاحب الطريقة
ومصاحب الطريق
وغضبى لو شيطانى
اتملك فى الاغانى
و صيت للظلام
أو قيد لى جناحى
وبراحى شال جراحى
سكوتى يكون حرام

حتى و لو دقيقه
مانا صاحب الطريقه
ومصاحب الطريق
ورضايا جوه نفسي
وصراخى زي همسي
وكلامى زين رقيق
مانا صاحب الطريقه
ومصاحب الطريق
فى حلمى مش أنانى
و بانسج فى الأمانى
و أعانى لو يعانى
فى رحلتى الرفيق
ما نا صاحب الطريقه
ومصاحب الطريق
محبوبى مرايتى
وهو هو غايتى
و سرورى فى سريرتى
و سرى سر سيرتى
و خمرتى العتيقه
و بردى فى الحريق
مانا صاحب الطريقه
و مصاحب الطريق!

لو أستغرق في عينيكِ ...!

لو أستغرق في عينيكِ

قد أتحول

قد يتغير كل ما يسكن

عقل العقل!

يا سيدتى ..

هل يتبدل قدرى المظلم

إنى أهوى دوما .. دوما

شيئا أبعد من خطواتى

لو استغرق فى عينيك

قد أتناثر فيكِ شظايا

أعرف أنك شئ أعمق من أشواقى

أعرف أنى الضائع دوما فى الأحداقِ

أعرف أن الشمس تدور

و أن الشجر يهوى النور

و أن الحلم لا يعرف أرض …

.أعرف أنى أسير النبض

أعرف إسمى

أعرف أسماءك...

أهواها

أعرف أنك مملكة لأمير غيرى

أعرف كيف سيدحر جيشى

لكن سيدتى عذرا

الشاعر يهوى من يقتله

يا قاتلتى!

لو أستغرق فى عينيك

سأصلب مرات .. مرات

و ستأكل أطيارك من رأسى ثمرات

و قد تضحك عيناك الطيبتان

وقد تبكى

لكن سيدتى

جربت الموت و لم يقدر يسلب أحلامي

جربت هزيمة أيامى

لكنى تجديد بميعاد

إنى موت .. يتلوه ميلاد

(ميلادى يتجدد فى رحم الموت)

سيدتى أعرف أن الصمت ..

جبل يحجب أرضى العطشى

عن جيش الفرح الفياض

أعرف أنى ألبس درع الوهم

أركب خيلا مجنونا

و أحارب أشباحا ..لا توجد

و أعداء ... لم تولد

وجبارا لم يظلم غيرى

لم يدرِ أنى سآتى فى محرابك يوما لأصلى

لم يعرف

انى سأولد فى عينيك يوما أتمنى !

كان يحبك

أو كان يريد من فمك سقياه

لم يعرف

أو جرب

كيف أذوق "الآه"

أعرف أنى فى نظر المجتمع الموبوء

مجنون يركب أطياف الكفر

و أنى رمز لدروب العهر

و أنى شيطان الزمن الطهر!!

عصر تُبتاع المرأة فيه

ما أبخسه عصر!

سيدتى

لو أستغرق فى عينيك

أبقى مشدودا فوق دروب غروب

فوق الأحزان المسنونة خزوق

فى قلب الأيام الملتهبة

يا نار كونى بردا وسلاما كى أنجو

أعرف أنى لست نبيا

و لست البطل العربى

يخطف من يهوى ويفر

و أنى لست النجم اللماع بالقداحة الذهبية

و لم أدمن "برفانات" العصر الباريسية

شاعرا أبقى

كالشجرة فى قلب " الأسفلت"

أتأبى إلا الحب

و أمد الغصن إليك

أخضر ...غضا ... متلهف

أعرف أن الغصن سيقطع

يشعل فيه اللوم

سيدتى

لا لوم عليكِ

إن بعتِ كلماتي في السوق

إني أتوق..

لو أدفن فيكِ فيك ِ ..

لو أختار ..

تتعادل نيران النار

بنعيم الجنة

يا شيئا أشبه بالصفر المطلق

أطلق طلقاتك كي أطلق

من قيد اليأس

أعرف كل الأشياء

لا أخشى ــ حتاه

الموت رحيل لا غير!

و بقائى أتنفس شئ موقوت

لا أخشى صدا

لا أخشى الوصل أخشى هذا الصعلوك

مليك مدينتك الجبار

شرير حكايات الجدة

يغلق أبواب الرؤيا

فكونى فاشل.

لم أعرف .. كيف أحول فكرى ساحرا

قلبي طائرا

جسدي شاعرا

كي يتخفى في ثوب الكلمات

يمر!

الدم واللذة

كسر الباب ..
شال الرزه
و الفحل أبو "شماغه" و "كنزه"
ما تحرك و لا بين هزه
قالّو هانخد منك جازك
وهانمحى غناويك وارجازك
و لا تلقى ... أفراخ و لا مُزه
اتلبش البدن الفارع ...
و اتكلم و الفعل مضارع ...
و بكرمه البدوى المتزايع:
إشرب كاس الدم العربى ...
راحتى يا سيدى
تيجي فى قربى
ما تهمش أنغام السيكه...
انا عاشق ف البند الغربى:
"فيرى جود بوى "
عارف سر مزاجى وشربى
أشرب وانا محتاج للمَّزه؟!!
:تنفع غزه ...؟
طهياها بكرامه و عِزه
البنت أم عيون واسعين ...
ليلى تكون ..
.أو يمكن عَزه
بمهارة تسقيك الكاس ...
وليونه بتجيب اللذه
قالّو: خلاص انت متعولم ...
وهانرضى عنك ونسلم ...
ونسيبلك فى البير جاز
و الخيمة وعصايه وعنزه ......
فرح الفحل العربى المارد
بمشاعر اللوح البارد
اتنفس أنفاس أرجيلته
واتعوذ من كل معارض
وبيهمس لحريمه بخوف:
أفديكو ..
.بالقدس وغزه

كشوف فى بحر الهوى

بحر الهوى مسجور
ومركبى الحيران مش قد أمواجه
و الشوق كمان هاجه
و انا ذنبى فى الترحال
و حبيبى محتاجه
"بسيدون" شيطان مرعب
توهتى فصوص تاجه
***
كان نفسي أفهم ايه المصير بيكون
كان نفسي مره أكون
غير كونى متحير
يا قمر الليل المنير
انت عارف ان نورك مش بصير
تبقى محتاج العيون
طب و ليه الكبر واصل للجنون؟؟

***
لما الجِمال سمعت حاديها انطلقت
و سابونى بين القطر ... و طيارة مش ليا
وغربه ملفوفه فى الشكل كهديه
وهى صكوك موتى
ما الرك على النيه
*****
بتغنى و بترقص
فى كبريهات و فيديو كليب
ميته و بتحب!
سالومى وانا يحي
لو أموت تحيا
و لو أحيا تموت ....
و العشق بالنبوت ...
وحنانى سلع راكده
ورمونى ليه فى الجُب
علشان نفسي اشب؟
ولا عشان صوتى
دفى قلوب بارده؟
*****
انا مش فارد لجناحي خلاص
قصوه الناس
و سابونى لا انا زاحف ولا طاير
و لاقادر ع الموت
ولا حاير
عارف تلافيف السكه و شايف من بعد السور
لكن عاجز على خوض الرحله
و أشواقى حضور
دا جحيم فى الدنيا .. و لاّ دا لهيب النور؟
من بره نعيم
من جوه عذاب لكن ساتر
و الغيب مستور
****
هى كده لما تتعرى فى عنيك
و لما تلمسها بإديك
و لما بيدوقها لسانك
ما تلاقيش و لا أى شئ!
وهم زي كبوس عويل
و حضنها لو كان طويل
زي ضل ما تعرفوش
يبقى ليه محتاج دليل؟
*****
هنا
فى زحمه الاصحاب
و ف عز النهار
قلبى كان موحوش وحيد
كان بيتهجى فى أسمك
كان بيسترجع ملامحك
وشك الحلو العنيد
كنت حاسس رغم بعدك
انى برضه مش بعيد
وكل شئ من غير وجودك
فاقد الاحساس بليد
هو ليه الفرح بعدك مش سعيد؟
هنا
****
مش بس الوقت بيخلع كل ملامحه و يقعد مجهول
انا زيه مش بإرادتى
دا مصير ...
هاتقولى عليا بحب الكدب و بانسج من تخريفى حكايه
طيب لو قلت ما اعرف عن سر سكوت البحر
و عن رحلة قلبى على متن حصان طيار
لو شفتى لوحه راسمها بحبر حياتى
لجيوش الشر
و طيور الخير ....
هاتقولى خيال مجنون
طب لو بس عرفتى ان اللوحه حقيقه
و ان السلطان الساحر .. مسحور
ما يفرقش ما بين الضلمه الغضبانه
و الضلمة الى تحب النور
يوه ...
مش ذنبى ان القدرة فى عينك ما بتعرفش غير الشوف المعتاد
و انا عينى بتخطى غيطان البور
حبيت أوصفلك جايز يجي فى يوم وتشوفى
ما تترعبيش
****
معرفش م الحقايق ...إلا وجوده هو
شعاع حنان واصلنى
من جوه جوه جوه
وما شوفشى فى المرايا
إلا ملامحه هو
و الريح لو كان مواتى
ولو كان الجو نوه
ما باشوفش إلا هو
و القلب لو يغنى
للدنيا أحلى غنوه
ما اسمعش فى الحقيقه
ولا غيره إلا هو
الكل خيال خياله
هو العَاِلم بحالى
و انا العَالمََ بحاله
زي ما ما قالى هو:


( وما رميت إذ رميت ولكن الله رمي)