الثلاثاء، 22 أبريل 2008

فتافيت العشق و الاحتمال



(1)
يا حبيبتى لاقينى
نفسي تضمينى
البرد هالكنى
و البعد سابينى
يا حبيبتى مش قادر ..
أزاى أكون طاير
وجناحى ناسينى
وانت السما فيكي
هاجره عناوينى
*********
(2)
لما بقولك
رغم الخوف والضلمه باحبك
لفظة حبك
تومض زى شهاب
مشتاق للأرض
زى جنين بيهزه النبض
و الحرف الأول
لما يضم حروف الكلمه
يتجمد زمن اللفظ قصيدة
تتردد و الكلمه عنيده
يصبح فيها الحرف
يلون كل كلام الدنيا
ألوان دافيه
و صافيه و حانيه
لما باقولك
إنى بحبك
*********
(3)
حطيت الأمس فى جيبى ...
وطلقت لبكره براح
كان أملى أعيش وارتاح
سرقونى فى لحظة وجد
وانا عاشق أصلى بجد
لا لقيت الامس معايا
و لا بكره طلعله صباح
*********
(4)
قابلته زي ما سيبته
وقابلنى لقانى باشيب
طبطب على كتفى وقالى:
قمحك مش راضي يطـيب
ولا عمرك كنت فى أهلك
و لا عمرك كنت غريب
واقف تايه فى البين
لا بتاخد ولا بتجيب ..
فجأة بدأ الرحلة
يبعد وانا إيدى تسيب
صرخت بنادي عليه :
يا أملى انا بيك مستنى
يا أملى ليه بتخيب ؟
مرسلة بواسطة في

ليست هناك تعليقات:

إرسال تعليق

الاشتراك في: تعليقات الرسالة (Atom)